திருக்குறள்: 400 – பொருட்பால் – கல்வி அதிகாரம்
“கேடில் விழுச்செல்வம் கல்வி யொருவற்கு
மாடல்ல மற்றை யவை.”
வள்ளுவர் பெருமான் இக்குறளில், அழியாத உயர்ந்த செல்வம் கல்வி என்றும், மற்ற செல்வங்கள் அதற்கு ஈடாகாது என்றும் வலியுறுத்துகிறார்.
இதனைத் திருமூலர் அருளிய,
“தன்னை அறிய தனக்கொரு கேடில்லை”
என்ற திருமந்திர வாக்கியத்துடன் இணைத்துப் பார்க்கும்போது, வள்ளுவர் கூறும் “கல்வி” என்பது வெறும் எழுத்தறிவு அல்லது உலகியல் அறிவு மட்டுமன்று; மனிதன் தன்னைத் தானே அறிந்து கொள்ள உதவும் ஞானக் கல்வியாகும் என்பதும் விளங்குகிறது.
தனக்கே கேடு விளைவிக்காத கல்வி எது என்றால், அது ஒருவரை அவரது உண்மை இயல்பிற்கு அழைத்துச் செல்லும் தன்னை அறியும் கல்வியே ஆகும். இத்தகைய கல்வி மனிதனை அறியாமையிலிருந்து விடுவித்து, நிலையான அமைதிக்கும் ஞானத்திற்கும் வழிநடத்துகிறது.
அவ்வாறு ஒருவருக்கு தன்னைத் தனக்கே அறிவிக்கும் கல்வியை வழங்குபவர் எவரோ, அவரே தமிழ் பழமொழி கூறும்:
“எழுத்தறிவித்தவன் இறைவன்”
என்ற பொருளுக்கு ஏற்ப, இறைவனின் அருளை வெளிப்படுத்தும் குருவாகத் திகழ்கிறார்.
இறையருளால் உணரப்படும் இத்தகைய தன்னறிவுக் கல்வியின்றி பெறப்படும் அறிவும், அதன் மூலம் சேர்க்கப்படும் செல்வங்களும், வெளிப்படையான பயனைத் தரலாம்; ஆனால் அவை நிலையான சிறப்பையும் முழுமையான நிறைவையும் அளிக்க இயலாது.
ஆகையால், அழிவில்லாத விழுச்செல்வம் என்பது தன்னை அறியும் கல்வியே; அந்தக் கல்வியே மனித வாழ்வின் உயர்ந்த பேறும் நித்தியச் செல்வமும் ஆகும்.
வாழ்க தமிழ்! 🙏
வாழ்க வள்ளுவம்! 🙏
Aadesh 